BI PERTSONA JARRI GENITUEN MAHAI GAINEAN

Bi pertsona jarri genituen mahai gainean, Alberto Luengo eta Jose Luis Garcia; eta bi gai naturarekin eta kulturarekin loturikoak, Oria ibaia eta Amalur jardunaldiak. Elkarrizketa bati esker, izugarrizko informazio iturria topatu genuen.

Elkarrizketaren lehen zatia gaur egungo gai baten inguruan izan zen, Amalur jardunaldiak, apirilaren 16, 21, 22 eta 23an. Aitortu ziguten aurtengo balorazioa oso positiboa izan dela, izan ere, Javier Reverteren hitzaldian 400 pertsonatik gora bildu ziren; bi iritzi izan genituen aurtengo hitzaldirik onena zein izan zen jakiteko. Hitzaldietara joan zirenek esan dezakete bidaiari, abenturazale edo hiztun bakoitzarengandik zerbait berria eta aberasgarria lortzen zenuela. Albertoren ustez, aurtengo hitzaldirik onena eta harrigarriena Román Moralesena izan zen. Jardunaldietara lehen aldiz etorri zen kanariar honek onerako harritu zuen publikoa; hala ere, Jose Luisen arabera hitzaldirik onena, hunkigarritasunagatik, Antxon Arzarena izan zen. Kanpotik oso erraza ematen duela ere esan ziguten, baina gai bat aukeratu eta jardunaldi batzuk antolatzea errealitatean ez da hala. Hizlari batek huts egin dezake eta aste osoko plana hautsi daiteke, baina, azkenean, nahiz eta oso nekatuta bukatu, oso pozik bukatzen dituzte. Gaiarekin amaitzeko, galdetu genien ea espero zutena betetzen zen eta dudarik gabe, baiezkoa eman ziguten.

Elkarrizketaren bigarren zatia gure eguneroko gai bat izan zen: Oria ibaia. Erantzunak garbiak izan ziren eta bertan geundenok harritu egin ginen egia jakitean. Konturatu ginen ibaiak bizitza ematen diola herriari, bere inguruan bizi garelako eta hainbat gauzatarako erabiltzen dugulako: entrenatzeko edo Tolosako argazki bezala, Santa Maria, Uzturre eta Zerkausiarekin batera. Galdetu genienean ea zer hobetu behar genuen bertan, esan ziguten nahiz eta eboluzio positiboa eduki, beraiek gogoratzen dutelako ibaia kolore desberdinetakoa ikusi izana, paper fabrikek erabiltzen zuten tintaren arabera edo eskolako leihoak itxi behar izana haizea zetorrelako eta aparra airean zebilelako, esaten dute oraindik asko geratzen dela egiteko. Beraiei esker beste pertsona batzuek ibaiaren inguruan pentsatzen dutena jakin genuen eta hori erabili genuen egunero duguna baloratzeko. Jendeak asko baloratzen du mendia eta ibaia bata bestearen ondoan ikustea eta Oria ibaia Europako kutsatuenetarikoa zala ikastea eta orain horrela ikustea, beraiei hitz batean esanda, harrigarria iruditzen zaie.

Bukatzeko, ibaiaren inguruko balorazio orokorra eskatu genien, eta hori izan zen guretzeko momenturik onena, bizitzan ahaztuko ez dugun esaldi bat entzun genuelako: “Oria ibaia zaindu behar dugun nerabea da”.